ആദികാ്ല മുദാ്ല് താ്നെ കുറുമ്പാ്ര് ബമ്മേസ നമ്പിമ് കുമ്മുഡിമ് നഡാന്തിന്താദ് ശിവാ്ന് സെലെനത്തെ.അദേപാ്സെ ബദ്ധ്രഗാളി, മുരുഗാ്ന്, അയ്യപ്പാ്ന്, ഗണപതി, രങ്കനാദാ്ന്, ഇത്തവ സാമിഗാള്നാമ് കുറുമ്പാ്ര് ബമ്മേസ നമ്പി നഡാന്തിന്താ്ര്. കുറുമ്പാ്ര് ബമ്മേസാക്ക് മദ ഇല്ലെ, പൊതുവെ കുറുമ്പാ്ര്ന ആദികാ്ല മന്സാ്ര് എന്റ്ത്തെ സൊല്ലുവാദ്. നായ നൊഡിവ സട്ട്മെ്ട്ട് പഡി, അദേ പാ്സെ പ്ളേപ്പ് രീതിഗാള് ഇദ്നെല്ല കണ്ട്പഡിത്ത് സര്ക്കാ്ര്ത്തെ ഹിന്ദു മതാക്ക് സേത്ത്നാദ്.കുറുമ്പാ്ര് ബമ്മേസ സോലെദൈവ ദേര്ഗാള്നാമ്,ബീ്ഡ്കാഡ്ല ദൈവദേര്ഗാള്നാമ് മുഖ്യമായി കുമ്മുഡിമ് നമ്പിക്കേമ് ബെത്ത് നഡാക്ക്ന്റാ്ര്. ജാദി നമ്പിക്കെ പഡി കുറുമ്പാ്ര് ബമ്മേസ ഗേവാദ് നോമ്പിമാത്രത്തെ. ഈ നോമ്പിത്തെ ബര്സാ ബര്സ ഗേന്ത് ബരുവാദ്. ഒന്റ് ജാദില്മ്, ഒന്റ് സാമില്മ് നമ്പി നഡാക്ക്ന്റവാ്രല്ല കുറുമ്പാ്ര് ബമ്മേസ. ഇന്നാ്ല്ല സട്ട്മെ്ട്ട് പഡി ഹിന്ദു മത ജാദിഗാള് ഗേവ പാ്സെത്തെ കുറുമ്പാ്ര് ബമ്മേസ നമ്പി നഡാക്കുവാദ്മ്, പ്ളേത്ത് പോവാദ്മ്. പ്ളേപ്പ്ല്ഗാള് കജറ്റ പാഡ് ബന്ത ബേ്റെ ബേ്റെ സാമി ഭൂമിഗാള്ക്ക് പോയി നേര്സെ കൊഡ്ക്ക്ന്റാ്ര്.പാവ തീരുവാദാ്ന മര്ദമലെ കോയാ്ല്ക്ക് പോയി നേര്സെ കൊഡ്ക്കുവാദ്.ആഡ്മാഡ്ന നേര്സെ കൊഡ്ക്കുവാദാ്ന ബദ്ധ്രഗാളി കോയാ്ല്ക്ക് പോയി നേര്സെ മാഡ്ഡൊ. ഇത്തെ പല ബിധമാ്ന നമ്പിക്കെ കുറുമ്പാ്ര് ബമ്മേസാത്ത്ല് ഇര്ക്ക്ന്റ് .ഇത്തെത്തെ കുറുമ്പാ്ര് ബമ്മേസ നമ്പി പ്ളേത്ത് പോവാദ്.
Search
ജാദി നമ്പിക്കെ
Share Everywhere
